Хара-Шэбэр нютагта заншалта болоhон хэлэнэй һара түлэг дундаа ябажа байна. Октябриин 17-до Соел болбосоролой байшан соо hурагшадай, багшанарай дунда "Түрэл манай - буряад хэлэмнай" гэhэн хэдэн хэмжээ ябуулганууд эмхидхэгдээ.
"Баян даа буряад хэлэн" гэhэн мүрысөөндэ нэн түрүүн түрэл хэлэеэ хэр hайн мэдэнэб гэжэ hурагшад харуулаа. Һурагшадай ухаан хэр түргэн, хэлэниинь хэр хурса гээшэб гэжэ нютагай номой сан түлөөлэгшэ Батоболотова Б.Ш., буряад хэлэнэй багша Будаева Ц.Г. элирүүлээ."Буряад арадай хубсаhан" гэhэн станцида нютагай оедолшон, Могойто аймагай уран зохеолшодой гэшүүн Базарова Ц.Ж. өөрын оеhон элдэб гое тэрлиг, дэгэл, малгайнуудаа асаржа hурагшадта харуулаа, зүйлнүүдтэйнь танилсуулаа."Аяга сай эдеэнэй дээжэ" гэhэн станцида Ветерануудай Соведэй гэшүүн, "Северный" гэhэн ТОСой дарга Дашидодокова Б.Б буряад арадай эдеэн тухай хөөрэжэ, харуулжа, өөрын хэһэн сагаан табаг эдеэнээр, амтатай үрмөөр хүндэлөө."Баргай наадан", "Шагай наадан", "Аза талаан", "Шагай харбаан" гэһэн буряад-монголшуудай нааданууд һурагшадай һонирхол, анхарал ехэл буляагаа. Эдэ мүрысөөнүүдые нютагай Соел болбосоролой байшанай дарга Доржиева Т.Ц., ажалшад Дугарсурэн Чингэс, Чимитова Ж.Ц. үнгэргөө. "Буряад арайдай дуун, хатар" гэhэн станци соел болбосоролой залуу специалист, дуушан Содбоева А.И. ябуулаа. Энэ ехэ хэмжээн ябуулгаяа дуугаа татажа, еохороороо дүүргэбэ.фотозураг дээрэ эдэ мүрысөөнүүдтэ түрүү һуури эзэлhэн һурагшад ба "Түрэл хэлэеэ магтаяа" гэһэн шүлэгэй мүрысөөндэ илажа гараһан һурагшад байна.
